Repsol YPF

Sukaldaritza denbora luzez hermetismo eta sekretismo handiz inguratuta egon da. Oraintsu arte sukaldari ospetsuek errezelo handiz gordetzen zituzten euren errezetak. Baina bezeroen aurrean kuzinatzea ez da gauza berria. Iraganean, asko ziren beren abildadeak jendearen aurrean frogatzeko aukera egiten zuten profesionalak, beren artearekin jendea txundituta uzteko asmoz. Beraz, ez zen batere arraroa "maitre" bat zerbitzatu aurretik platera bezeroaren aurrean prestatzen amaitzen ikustea.

Show Cooking korrontearen hastapena, Espainian, 70eko hamarkadan kokatzen da, ostalaritzan buffet-zerbitzua ezartzen hasi zenean. Egun, jatetxe askok, nahiz hirietakoek nahiz kostakoek, gosari, bazkari zein afarirako sukaldaritza zuzenean eskaintzen diete bezeroei.  

Behar bezalako azpiegitura edukiz gero, sistema hori primerakoa da hotel handi nahiz txikietarako. Baita kartarik gabe lan egin nahi duten jatetxeentzako ere. Bezeroak produktuei behatzen diete eta zer jan nahi duten aukeratzen dute.  

Zer kuzinatzen da?

Show Cooking batean, kasik gauza guztiak kuzina daitezke. Jatetxeek azpiegitura material jakin batzuetara egokitu behar dute eta bakoitzak duen bezero, langile eta aurrekontua hartu behar dute kontuan. 

Erabilgarri duten materialaren arabera, zuzeneko sukaldaritza-mota bat baino gehiago defini daitezke: plantxa soil batekin, gosaritarako arrautzak, arrautzopilak, hirugiharra, urdaiazpikoa edo krepeak zerbitza daitezke; eta bazkaritarako eta afaritarako haragiak eta arrainak. 

Gainera, frijigailua eta pasta egosgailua edukiz gero, patata frijituak eta mota guztietako frijituak gehitu daitezke, eta baita unean bertan egositako pasta-mota desberdinak ere, bereziki, bazkaritarako eta afaritarako.  

Su bat baino gehiago edukiz gero, plater prestatuagoak, esaterako, erregosiak eta paellak, egin eta unean bertan zerbitzatu ahal izango dira. Eta horri guztiari labe bat gehitzen bazaio, mahaikidearen aurrean kruasanak, ogiak, kaneloiak, mota guztietako gainerreak, haragiak eta arrainak ere prestatu ahal izango dira.  

Abantailak eta eragozpenak

Platerak zuzenean prestatzean eta unean bertan zerbitzatzeak, batez ere, abantailak eskaintzen ditu bezeroarentzat zein jatetxearentzat. Abantaila nagusia da jan behar dena soilik kuzinatzen dela; ondorioz, prestatutako janaririk ez da sobera geratuko eta, sarritan gertatu ohi den moduan, ez da zaborretara botako. Beraz, gauza jakina da lokalentzako ekonomikoa dela, dirua aurreztuko baitu. 

Bezeroak jan behar duena nola prestatzen duten zuzenean ikusten du. Horrela, produktuek eta horien manipulazioak ez du mesfidantzarako bide emango. Gainera, mahaikideak ziur jakingo du zerbitzatzen dioten janaria ez dela berriz berotua edo aurretik prestatua izan. Halaber, plater jakin bat bere gustura egoteko nola prestatzea nahiko lukeen erabaki ahal izango du.  

Bestalde, janaria prestatzen duen profesionalak, neurri batean, bere jokamoldeak eta lana egiteko erak, higienikoagoak –hori posible bada– aldatu beharko ditu. Show Cooking-ak langileak sukalde atzean har ditzakeen bizio edo ohitura txarrak eliminatzen lagun dezake eta, horrela, bere profesionaltasuna areagotu.  

Formula horren eragozpena langileen trebakuntza gabezia litzateke, epe laburrean konpondu daitekeen arazoa. 

Gaiarekin lotutako artikuluak

- Bistronomie, sukaldaritza gorena prezio merkean

- Lounge batean afaltzea