Repsol YPF

Risottoa prestatzeko arroz-mota egokia aukeratzerakoan, japoniarra deitutako espeziea (gehien erabiltzen diren arroz-barietateak arborioa eta carnarolia dira) gomendatzen da, ale biribilak eta motzak, porotsuak eta almidoi nekez isurtzen dutenak primerakoak dira gustuko dugun testura krematsua lortzeko. 

Testura hori lortzeko, alegia, kanpotik biguna baina barnetik gogorra, oso zorrotza izan behar da egoste-denborarekin. Hasteko, tipula frijitzen jartzen da, oso motel eta, ondoren, arroza gehituko zaio eta pare bat minutuz nahastuko da aleak gorritu gabe. Basokada bat ardo zuri lehor botako zaio eta ondo nahastuko da harik eta lurrundu arte. 

Jarraian, koilarakada handi bat salda (barazki- nahiz haragi-salda) gehituko zaio eta lurrundu arte itxarongo da. Puntu horretara iristean, beste koilarakada handi bat gehituko zaio, likido gehiegi eduki ez dezan zainduz, baina, era berean, kazola gehiegi lehortu gabe. Garrantzitsua izango da arrozari botatzen zaion likidoa gaziegia ez egotea, likidoa lurruntzean gatz-kontzentrazioa areagotu egiten baita eta, ondorioz, platera inork ez jateko moduan gera daiteke. Arrozak itxura belusatua eta krematsua hartzen duenean, sutatik kendu behar da; horri gazta parmesanoa gehituko zaio eta ontzia estaliko da.

Errespetatu ordena 

Prestaketa horrek osagai oso desberdinak onartzen baditu ere, prestatzeko formula beti berdina da: lehenengo, osagaiak gurinetan sueztitzen dira, jarraian, arroza gehitzen zaio eta bukatzeko, salda.

Nahiko ohikoa da perretxikoekin prestatzea. Horretarako, kazola batean, gurinetan, tipula apur bat eta baratxuri ale batzuk gainetik frijitzen dira eta perretxikoak gehitzen zaizkio gatzaz eta piperraz bakoitzak bere gustura gozatuta. Minutu batzuetan utziko da, baina hori bai, gehiegi gorritu gabe, eta arroza gehituko zaio etengabe nahasten jarraitzen den bitartean. Pare bat minutu igaro ostean, ardo zuria gehitzen zaio eta nahasten jarraituko da harik eta hura xurgatu arte. Ondoren, sua jaitsiko da eta hainbat basokada salda bero gehituko zaizkio banaka-banaka eta eragiteari utzi gabe harik eta arrozak likido guztia xurgatu arte. 20 bat minutuz egiten egongo da, estali eta jalkitzen utziko da. 

Risottoa pesto-saltsarekin eta otarrainxkekin goza dezakegu. Arroza arestian aipatutako jarraibideak jarraituz prestatzen da eta sutatik kentzen dugunean, pesto-saltsa gehitzen diogu. Saltsa hori aldez aurretik eginda edukiko da. Horretarako, pinaziak, baratxuriak, gatza eta albaka txikitzen dira eta gazta eta olio apur bat gehitzen zaizkio. Guztia ondo nahasten da eta hozkailuan uzten da erabili behar den unera arte. Otarrainxkei dagokienez, gatzez eta piperrez gozatu eta zartaginean apur bat gorritzen dira eta risottoaren alboan jartzen platera apainduaz. 

Osagai desberdinekin

Risottoa kalabazaz eta txanpinoiez ere konbina dezakezu. Kazola handi batean, bost bat minutuz tipula txikitua arinki gorritzen da eta, jarraian, azenario txikitua gehitzen zaio. Nahasketa hori beste hamar bat minutuz arinki frijitzen utziko da. Bestetik, kalabaza zuritu eta dadotan –ez oso txikiak–  zatitzen da. Kazolara gehitu eta gatza, piperbeltza eta erromeroa gehitzen zaizkio. Ardo zuria botako zaio eta lurruntzen utziko da. 

 Txanpinoiei dagokienez, zati txikitan zatitzen dira, kazolara bota eta bost bat minutuz egosten utziko zaie. Bukatzeko, arroza gehitzen da, ondo nahastu eta aurretik prestatu dugun salda beroaren lautik bat botako zaio. Horrek guztiak su motelean egiten joan behar du eta arrozak likidoa xurgatzen duen heinean, gehiago gehitzen zaio. Sutatik kendu eta jalkitzen utzi ondoren, gazta parmesanoa gehitzen zaio.

Beste konbinazio desberdin bat zainzuriekin eta odolkiarekin prestatzea izango da. Hasteko, su motelean, tipula eta baratxuri-ale bat arinki frijituko dira eta dadotan zatitutako gari-zainzuriak gehituko zaizkio. Guztia sueztitzen da. Arroza eta ardo zuria gehitzen zaizkio eta sueztitzen jarraituko du minutu batez, baina, oraingoan, su handian. Ondoren, sua ahal den gehiena jaisten da eta haragi-salda beroa botako zaio koilarakada handitan, arrozak xurgatzen duen heinean eta etengabe eraginez. Horrela, jarraitu behar da hogei bat minutuz. Arroza kasik egosita dagoenean, gatzez eta piperrez gozatu, odolkia gehitu (zurituta eta dadotan zatituta) eta gainerako osagaiekin nahastuko da. Mahaira zerbitzatzeko unean, gazta parmesano apur batez hautseztatuko da.  

Gaiarekin lotutako artikuluak:

- Basmati arroza

- Tabbouleh, Ekialdeko delicatessen